عێراق و تورکیا لەسەر هەڵگرتنى ڤیزە رێککەوتن

ئەو رێککەوتنە لە کۆبوونەوەیەکى نێوان شاندێکى وەزارەتى دەرەوەى عێراق بووە بە سەرۆکایەتیى عومەر بەرزنجى، بریکارى وەزارەتى دەرەوە بۆ کاروبارى فرەلایەن و یاسایی لەگەڵ یاسین ئەکرەم سەریم، یاریدەدەرى وەزیرى دەرەوەى تورکیا، کە 9ى تەممووز لە ئەنقەرەى پایتەختى ئەو وڵاتە کراوە.

عومەر بەرزنجى لە لێدوانێکدا رایگەیاند، "لەگەڵ لایەنى تورکى رێککەوتین ڤیزەی نێوان هەردوو وڵات لەسەر ئەو کەسانە هەڵبگرین کە تەمەنیان لە 15 ساڵ کەمتر و لە 50 ساڵ زیاترن، ڤیزە بۆ تەمەنەکانى دیکەش وەکو خۆی دەمێنێتەوە."

پارەى ڤیزەى گەشتیاران بۆ تورکیا لە 130 دۆلارەوە دەستپێدەکات تاوەکو 200 دۆلار، نرخەکەى بەگوێرەى ماوەى مانەوە لەو وڵاتە دەگۆڕێت.

بریکارەکەى وەزارەتى دەرەوەى عێراق ئەوەشی خستەڕوو، لەگەڵ لایەنى تورکی رێککەوتوون بۆئەوەى بەندکراوانى نێوانیان بگۆڕنەوە، ئەو هەنگاوە ئەوانە دەگرێتەوە کە تاوانى سووکیان کردووە، لەدواى گەڕاندنەوەشیان لە وڵاتانى خۆیان سزاکە تەواو دەکەن.

بەگوێرەى راگەیەندراوێکى باڵیۆزخانەى عێراق لە تورکیا، لەو کۆبوونەوەیە پرسی کۆچى نایاسایی، ئاسایش، بنەبڕکردنى تیرۆر، هاریکاریى دادوەریى نێوان هەردوو وڵات کراوە.