بانکی ڕافیدەین لە ڕۆژی چوارشەممەوە کە دەکاتە سێی نیسان دەستدەکات بە پێدانی قەرز بەڕێگەی ئەپلیکەیشنی ئەلیکترۆنی بۆ فەرمانبەران و خانەنشینان.
ئەمڕۆ سێشەممە دووی نیسانی 2024، بانکی رافیدەین لە راگەیەندراوێکدا لەپەڕەی فەرمی خۆی لەتۆڕی کۆمەڵایەتی فەیسبووک رایگەیاند، پێشینەی خانەنشینان و فەرمانبەرانی بانکی رافیدەین لە رۆژی چوارشەممەوە بەرواری سێی نیسانی 2024 ەوە دەست پێدەکات، هەروەها ئەوکەسانەی دەیانەوێت قەرز وەربگرن دەتوانن بەڕێگەی ئەپلیکەیشنی ئەلیکترۆنی بانکی رافیدەینەوە داواکاری ئەنجام بدەن.
بانکەکە دووپاتی کردەوە، بڕی پێشینەکەش 5 ملیۆن بۆ 10 ملیۆن دینار دەبێت، بەگوێرەی مووچەی قەرزوەرگر کە ڕێژەییە لەگەڵ بڕی کۆی مووچەی مانگانەکەی.
رونیشیکردەوە، ئەم قەرزە بۆ ئەو کەسانەیە کە کارتی بانکی رافیدەینیان هەیە و لەڕێگەی ئەو بانکەوە مووچە وەردەگرن.
بانکی رافیدەین راشیگەیاند، بڕێکی کەم سوو دەچێتە سەر پێشینەکان، هەروەها قیستەکان لە مووچەی مانگی دوای بەرواری پێدانی قەرزەکە راستەوخۆ دەبڕدرێت.
172 جار خوێندراوه‌ته‌وه
