سەرۆکی هەرێمی کوردستان رایگەیاند، هیچ بڕیارێک بۆ دواخستنی هەڵبژاردنی پەرلەمانی کوردستان نییە لەو وادەیەی دیاریکراوە.
نێچیرڤان بارزانی، سەرۆکی هەرێمی کوردستان لە بەغدا لەبارەی هەڵبژاردنی پەرلەمانی کوردستان رایگەیاند، وەک بەرپرسیارێتی خۆی و سەرۆکی هەرێمی کوردستان، رۆژی هەڵبژاردنی دیاریکردووە و تاوەکو ئێستا هیچ گۆڕینێک بۆ دواخستنی هەڵبژاردنی پەرلەمانی کوردستان نییە.
راشیگەیاند، ئەوە بابەتێکی سیاسییە و دەبێت هەموو هێزەکان قسەی لەسەربکەن و لە ئەنجامدا بە "تەفاهوم" لەم بابەتە دەربچن.
نێچیرڤان بارزانی ئەوەشی خستەڕوو، کۆبوونەوەکانیان لەگەڵ سەرۆکوەزیرانی عێراق و هاوپەیمانی بەڕێوەبردنی دەوڵەت لە چوارچێوە پەیوەندییەکانی هەولێر و بەغداددا بوون.
سەرۆکی هەرێمی کوردستان ئاماژەی بەوەشکرد، هەوڵدەدەن کۆبوونەوە و سەردانەکانیان بەردەوامبێت بۆ ئەوەی هەموو کێشەکان بەگفتوگۆ چارەسەر بکەن.
نێچیرڤان بارزانی لەبارەی راگرتنی هەناردەی نەوتی کوردستانەوە دەڵێت، گفتوگۆمان لەسەر پرسی نەوت کرد و دەبێت هەناردەکردنەوەی دەستپێبکات و لە وەستانی هەناردەی نەوت زیاتر لە حەوت ملیار دۆلار زیان بەر بوودجەی عێراق کەوتووە.
72 جار خوێندراوهتهوه