سەرۆکی هەرێمی کوردستان رایدەگەیەنێت، "دەبێت هەڵبژاردنێکی روون و دادپەروەرانە بکەین، دەشڵێت، پەرلەمانی کوردستان ئەزموونێکی گرنگە لە ناوچەکەدا و دەبێ بیپارێزین".
نێچیرڤان بارزانی، ئەمڕۆ چوارشەممە لە دیداری سلێمانی رایگەیاند، "با کای کۆن بە با نەکەین؛ پوختەی قسەی دڵی خەڵکی کوردستان یەکڕیزی لایەنە سیاسییەکانە، چونکە بە دووبەرەکی ناوبانگێکی باشمان دەرنەکردووە".
راشیگەیاند، "پەرلەمانی کوردستان ئەزموونێکی گرنگە لە ناوچەکەدا و دەبێ بیپارێزین".
هەروەها لەبارەی عێراقەوە گوتی، "شێوەی مامەڵەکردن لەگەڵ هەرێمی کوردستان باشترین تاقیکردنەوەیە لەسەر دەوڵەتی نوێی عێراق".
ئەوەشی خستەڕوو، گەلانی عێراق لە 2005ـەوە لەسەر دەستوور رێکەوتوون، کە "هاوبەشیی گونجاوی تێدایە و عێراق بەهێز دەکات، بۆ پێشکەوتنی عێراق پێویستە سیستمی فیدراڵی بە تەواوی جێبەجێ بکرێت".
هاوکات لەبارەی دۆخی رۆژهەڵاتی نێوەڕاستەوە، سەرۆکی هەرێمی کوردستان
جەختیکردەوە، رۆژهەڵاتی نێوەڕاست بە بارودۆخێکی هەستیاردا تێدەپەڕێت و پێویستی بە ئاشتییە، "چارەسەری کێشەی فەلەستین و ئیسرائیل، دروستکردنی دوو دەوڵەتە بۆ هەردوولا".
دیداری سلێمانی لە زانکۆی ئەمریکی لە رۆژانی 17 و 18ی نیسان بەڕێوەدەچێت و ئەمڕۆ کاتژمێر 10:00 دەستیپێکرد.
بەشداربووانی دیدارەکە تیشک دەخەنە سەر گرژی و ئاڵۆزییەکانی ناوچەکە و سیاسییەکان، لێکۆڵەران و چالاکڤانان دەرفەتی ئەوەیان دەبێت گفتوگۆی راستەوخۆ لەبارەی پرسە جیاوازەکانەوە بکەن.
63 جار خوێندراوه‌ته‌وه
