بەڕێوەبەرایەتی نەهێشتنی مادە هۆشبەرەکان لە ئاسایشی هەولێر رایگەیاند، لە رووبەڕووبوونەوەی دوو بازرگانی مادەی هۆشبەردا لە عەنکاوە، کارمەندێکیان "بە سەختی" بریندار بووە، هەروەها یەکێک لە بازرگانەکان کوژراوە و ئەوی دیکەیان دەستگیرکراوە.
بەڕێوەبەرایەتیی نەهێشتنی مادە هۆشبەرەکانی ئاسایش ئاماژە بەوە دەکات، "کاتژمێر 6:15ی ئێوارەی 23-4-2024، تیمێکی سەر بە بەڕێوەبەرایەتیەکەمان بۆ جێبەجێکردنی فەرمانی دادوەر بەدواداچوونی دوو بازرگانی مادە هۆشبەرەکانی کرد".
باسی لەوەش کردووە، "لە دەوروبەری عەنکاوە، داواکراوەکان رووی چەکەکانیان ئاراستەی هێزەکانی ئاسایش کرد و کارمەندێکی بەڕێوەبەرایەتیەکەمان بەسەختی بریندار بوو".
بەڕێوەبەرایەتیی نەهێشتنی مادە هۆشبەرەکانی ئاسایش لە وەڵامی تەقەی بازرگانەکاندا، بەوتەی خۆیان، دەستڕێژیان لێکردوون و یەکێکیان کوژراوە و ئەوی دیکەش بریندارکراوە.
ئاسایش دەشڵێت، لێکۆڵینەوەکان بەردەوامن.
