هونەرمەند سەرکۆ سەردار رایگەیاند، حەز بە ستایلە جیاوازەکانی تر ئەکەم و بە گوێرەی گونجاندنی تواناو قبوڵ کردنی خەڵک و بە شێوازی گۆرانی و موزیکی نوێ بەردەوام ئەبم، دەشڵێت، لەکاتی گونجاودا بەرهەمی نوێم دەبێت.
هونەرمەند سەرکۆ سەردار لە میانەی لێدوانێکیدا بۆ کوردتایمز، لەبارەی کارە هونەرییەکانی رایگەیاند، بارودۆخ و ژیان و سەردەمی ئێستا زۆر کەلێن و ساردوسڕی خستۆتە نێوان کۆمەڵگا و هەموو چین و توێژێکەوە، ئاستی ئاسوودەی و ئومێدی کەم کردۆتەوە، ئێمەش بێبەش نین لە هەر خۆشی و ناخۆشی و نیگەرانییەک کە یەت بەسەر میللەتەکەماندا هاوکات پەیوەستم بە ژیانی ئاسایی خۆم و کارو ژیانی خێزانی.
سەرکۆ لەبارەی کاری نوێی ئاماژەی بەوەکرد، وەک بەرهەمی کلیپ هۆنراوە و ئاواز ئامادەیە بەڵام نەمخستۆتە بواری جێبەجێکردنەوە هاوکاتە لەگەڵ گونجاندنی دۆخی هونەری و کاتێکی باش بۆ دەستبەکاربوونم لەسەری.
دەربارەی ئەنجامدانی کۆنسێرت سەرکۆ سەردار رونیکردەوە، بێگومان هەردەنگ بێژێک پێویستە کۆنسێرت ئەنجام بدا لە کۆتاییەکانی تەمەنی هونەریدا، مەرجیش نیە کەوتۆتە سەر حەزو خولیایی ئەو هونەرمەندە، بە گوێرەی کاتیش ئەلبوومی گۆرانی سەردەمی نامێنێ و گوێگر بەدوای ڕێچکەیەکی تر ئەکەوێ بۆ خاڵی کردنەوەی هەستەکانی خۆی. لە سەردەمی ئێستادا شەوە ئاهەنگەکان بە بەشێک لە کۆنسێرت ئەبینم بۆ هەر هونەرمەندێک کە لە ئاستی دەنگ و احساس و ئەدا، وجودا پیشانی ئەدا بە هەوادارانی و میوانانی.
سەرکۆ سەردار، یەکێکە لەوهونەرمەندانەی کە خاوەن ستایل بەخۆیەتی لەبارەی گۆڕانکاری لەستایلی گۆرانی وتنی و هەڵبژاردنی ستایلێکی نوێوە دەڵێت، من وەک هونەردۆستێک پێم وانیە شتانێکی زۆرم کردبێ بۆ گوێگرانم بێگومان ستایلی ڕۆژئاوایی مەودایەکی فراوان و تایبەتمەندی زۆر لە خۆ ئەگرێت هێشتا کات ماوە کە ئیشی لەسەر بکەم.
هەروەها دەشڵێت، حەزیش بە ستایلە جیاوازەکانی تر ئەکەم و بە پێی گونجاندنی تواناو هەستی خۆم و قبوڵکردنی خەڵک و ئاشنا بوونی گوێگر بە شێوازی گۆرانی و موزیکی نوێ بەردەوام ئەبم، ئەبێ ئەوەشمان لە بیربێت کە پێویستە هونەری کوردی بەو هەموو جوانی و هەست و تایبەتمەندییەی خۆیەوە ببەینە ئاستی هونەری جیهانی و لە ناو بازنەیەکی دووبارە بووەدا ڕزگاری بکەین.
سەبارەت بە ستایلی نوێی هونەری کوردی سەرکۆ سەردار دوپاتیکردەوە، قسە زۆرە لە سەر لایەنی هونەری بەڵام ئێمە وەک میللەتێکی ماف خوراو و بێخاوەن لە هەموو لایەنەکانی ژیان و گوزەرانەوە کەموکوڕڕیمان هەیە، تەنانەت سەرنج و سەلیقە ی فکری تاکی کۆمەڵگاش زۆر کاڵ وکرچی خستۆتە نێو هونەری کوردییەوە بۆ هەڵبژرادن و جیاکاری هونەرێکی بەهێز لە هونەرێکی لاواز.
ئاماژەی بەوەشکرد، پێشکەوتنی میللەتان پەیوەستە بە هونەر و کلتور و فەرهەنگ بەڵام بەداخەوە هەڵکەوتەی کوردستان لە رووی سیاسی و نەبوونی دەسەڵاتێکی دلسۆز بۆ هەموو جومگەکانی کۆمەڵگا خاوبوونەوە و تەمێکی زۆری جێهێشتووە لە دونیای هونەریدا بۆیە هەرچەند لەسەری بدوێین نابڕێتەوە هەر شتێک کە ئەیبینین و ئەیبیستین تەواوکەری یەکن بۆیە هۆکار زۆرن .
هاوکات ئەو هونەرمەندە دەشڵێت، میللەتی کورد خاوەنی هەزاران دەنگبێژ و میوزک زان و شاعیر ئەکتەر و فلیمساز و ئەدیب و نوسەر و شێوەکارە بەلام پێویستی بە کاتە تا مافی خۆی و جێگای خۆی بکاتەوە لە دونیای ئەمرۆ و بە جیهانی بووندا پەیوەست بەو هۆکارانەی کە باسمان کرد.
149 جار خوێندراوه‌ته‌وه
