وتەبێژی کۆمسیۆنی باڵای سەربەخۆی هەڵبژاردنەکانی عێراق رایگەیاند، نمونەی كارتی دەنگدان بۆ هەڵبژاردنی پەرلەمانی کوردستان ئامادەیە، دەشڵێت، سبەی لە 180 بنکەش هەڵبژاردنی ئەزموونی بەڕێوەدەچێت.
جومانە غەللای، وتەبێژی کۆمسیۆنی باڵای سەربەخۆی هەڵبژاردنەکانی عێراق بە کورد تایمزی راگەیاند، پێنج نمونەی كارتی دەنگدان بۆ هەڵبژاردنی پەرلەمانی کوردستان لەلایەن کۆمسیۆنەوە بۆ هەریەکە لە سلێمانی، هەولێر، دهۆک، هەڵەبجە و دانەیەکیش بۆ دەنگدانی تایبەت ئامادەکراوە و چاوەڕوانی بڕیاری ئەنجومەنی کۆمسیۆن دەکەین بۆ پەسەندکردنیان.
ئەوەش خستەڕوو، کۆمسیۆنی هەڵبژاردنەکان لە رێگەی لیژنە تەکنیکییەکانەوە، یەکەم هەڵبژاردنی ئەزموونی لە رۆژی 16ی نیسان بە سەرپەرشتی عەباس فەتلاوی، لێپرسراوی کارگێڕیی هەڵبژاردنەکان ئەنجامدەدات.
دەربارەی بنکەکانی دەنگدان بۆ ئەو هەڵبژاردنە ئەزموونییەکە، وتەبێژی کۆمسیۆن رونیکردەوە، بنکەکانی دەنگدان بۆ ئەو هەڵبژاردنە 180 بنکەیە و حەوت بنکەیان بۆ دەنگدانی تایبەتە کە لە فەرمانگەکانی هەڵبژاردنی پارێزگاکان لە هەرێم ئەنجام دەدرێت و 173 وێستگەکەی دیکەش بۆ دەنگدانی گشتییە.
وابڕیارە 10ی حوزەیرانی 2024، هەڵبژاردنی پەرلەمانی کوردستان بەڕێوەبچێت.
86 جار خوێندراوه‌ته‌وه
